Manipur hel pawl commander South Delhi-ah an man

Delhi Police Special Cell chuan Nilaini khan thuchhuah siamin Manipur hel pawl Kang­leipak Communist Party (KCP-PWG) commander kum 45 mi chu Manipur Chief Minister N Biren Singh vaua puhna thu­buaiah an man thu an sawi.

KCP-PWG comman­der Oinam Ibochouba Singh hi South Delhi-a Kotla Mubarakpur area-ah Thawhlehni tlai khan an man niin police-te chuan an sawi.

Delhi-ah hian pawi­khawihna lam hawi zawnga hmalakna tur camp siam a tum mek nia puh a ni a, Manipur CM mai bakah hian minister dang eng emaw zat pawh a vau nia puh a ni.

Police-te chuan an thudawn bawhzuiin Thawhlehni khan Delhi-a hmarchhak mite khawsak tamna hmunah te chuan u;uk taka an enthlak thu sawiin a thurualpui Kotla Mubarakpur hmu tura a kal chu an lo man ta niin an sawi.

Deputy Commissioner of Police (Special Cell) Sanjeev Kumar Yadav chuan thu an zawhfiahnaah 2010-ah khan Assam Police-te pawhin Unlawful Activities (Prevention) Act hnuaiah an lo man tawh tih a sawi tih sawiin, thla khat vel tan inah tan tir a nih thu a sawi a, kum nga vel liamtaah khan Nepal-ah tlanchhia in Syangja bazaar area-ah awmhnun khuarin sorkar thuneitute leh mi hausa deuh te pawisa a laksak ṭhin niin a sawi bawk.

Yadav chuan Delhi-ah pawh hian pawikhawihna thlenna tur camp siam bakah, KCP-ten ralthuam an neih theih dan tur te ngaihtuahin a kal tih a sawi a ni.