Nagaland-ah ruahsur nasa vanga nunna chan 12 awm

Nagaland Chief Minister Neiphiu Rio chuan Nilaini khan kumin chhungin ruahsur nasa avanga chhiatna thlenga nunna chan 12 an awm tawh thu sawiin, sorkar laipui hnen aṭanga ṭanpuina an beisei thu a sawi.

Chief Secretary Temjen Toy pawhin ruahsurin thil a tihchhiat chu kum dang zawng aiin a tam zawk niin a sawi ve bawk.

Nagaland State Disaster Management thuneitute pawhin ruahsur nasa vang hian nunna chan mi 12 an awm tawh thu sawiin chhungkaw 3000 chuang chuan an chenna in an chhuahsan thu a sawi a, khaw 400 vel a nghawng niin an sawi bawk a ni.

Nagaland state sorkar hian sorkar laipui hnenah cheng vaibelchhe 219 ṭanpuina an ngen thu an sawi a, offical-te chuan cheng vaibelchhe 400-ah an tihsan dawn thu sawiin tuilianin thil a tihchhiat tawh zawng zawng chu cheng vaibelchhe 800 man hu vel a nih thu an sawi bawk.