Assam-a tlangval pahnih sawisak hlum thubuaiah mi 48 man tawh

Assam-a Karbi Anglong district-a Dok­moka-a mipuiin Guwahati khualzin tlangval pahnih an sawisak hlum thubuai kalzelah mi 48 man an ni tawh.

Guwahati khualzin tlangval pahnihte hi June 8 khan Karbi Anglong-ah hian naupang rukbo ching emaw tiin mipui thinrimin an sawisa hlum a, misual an nih loh thu leh Assam mi ngei an nih thu an sawi pawhin mipuite hian ngaithla duh loin nasa takin an sawisak chhunzawm zel a, an nunna hial an chan phah ta a ni.

Dokomoka police station-a police-te chuan an sawisakna hmun hi darkar hnih hnu velah an thleng a, tlangval pahnih hi dinhmun ṭha lo taka hmu in damdawi in lam an pan laiin an thi ta niin an sawi.

Guwahati tlangval pahnih, sound engineer Nilotpal (29) leh a ṭhianpa Abhijit (30)-te sawisak an nih lai hi video-a la in social media laman an theh­darh nghe nghe a ni.