AP: Siang atangin mi 34 chhanchhuak

Arunachal Pradesh-a East Siang District-a tui lenna hmun aṭangin Zirtawpni liamta khan IAF, State Disaster Response Force, East Siang district admi­nistration-te chuan mi 34 an chhanchhuak.

Ningani khan Siang luia thliarkar awmah chuan mi 19 an tang tih report a ni a, heng mite hi air force member panga te chuan Zirtawpni khan an chhanchhuak a ni. Anni bakah hian midang 15-te chu tualchhung mite leh SDRF mite chuan Pasighat area aṭagin an chhanchhuak ve bawk.

Air Force Team te hi Assam-a Dibrugarh district-a Mohanbari airbase mi te an ni a, thliarkar hi East Siang district-a Sille-Oyan circle huamchhung ami a ni thung.

Defence PRO Lt Col P. Khong­sai chuan Pasighat district thuneituten Siang luia tuilian vangin army hnenah hian ṭan­puina an ngen thu an hrilh tih a sawi a, Zirtawpni tlai dar 4:30 velah khan Mid 17-helicopter chu an thawnchhuak tih a sawi bawk. An mi chhanchhuah te chu hmun him lam panpui an nih thu a sawi.

District thuneitute chuan state sorkar hnenah Siang-a thlairkarah mi 30 vel an tang tih an hriattir a, darkar 24 zet an tang tawh tih an hrilh hnuah ṭanpuina hna thawh dan tur hi an ngaituah nghal a ni.

Dhemaji deputy commi­ssioner R.A. Korati chuan thul awmdan chu an enfiah reng thu sawiin harsatna em em an tawh loh thu a sawi bawk.