Assam CM-in political party leh pawl hruaitute Meghalaya border chungchang a sawipui

Assam chief minister Himanta Biswa Sarma chuan Meghalaya nena ramri hmun paruka an buaina chinfel tura hma an lak meknaah, Thawhlehni khan state chhunga political party leh pawl hrang hrang hruaitute meeting a neihpui.

Assam leh Meghalaya hian ramri buaina an neih, hmun 12 zinga hmun paruka buaina chinfel dan tur an ngaihtuah mek a, state pahnih chief minister-te pawh ṭum li an lo inhmu tawh a ni. Heng hmun paruka thil awmdan enfiah tura state pahnihin regional committee an dinte pawhin an CM-te hnenah report an thehlut tawh a, inremna siam thuai an tum a ni.

Thawhlehnia Guwa­ha­ti-a meeting-ah hian rorellai, BJP bakah Asom Gana Parishad (AGP), United People's Party Liberal (UPPL) hruaitute leh, eptu party - Congress, All India United Democratic Front (AIUDF), Bodoland People's Front (BPF) leh CPI-M hruaitute pawh an tel.

CM Sarma chuan, "Assam-Meghalaya ramri buaina chinfel tuma kan hmalakna chuan rah ṭha tak a chhuah chho zel a ni. Regional committee-te rawtna thehluh behchhanin, inremna siam dan kawng pawh hi ruahman a ni," a ti.

Eptu pawl, Cong­ress leh AIUDF hruai­tute chuan ramri chungchanga thutlukna hi special Assembly session neih hnuah chauh siam a ni tur a ni, an ti ve thung. Assam Congress Legislature Party (CLP) leader leh Nazira MLA Debabrata Saikia chuan special Assembly session ko a, ramri buaina chinfelna tura Assam-in a ram a pek ngai leh, a lak let tur chungchang sawiho phawt a phut a ni. Mankachar (South Salmara) MLA Aminul Islam pawhin meeting-a sawiho ringawt loin, Assembly session-ah ngaihtuah ho a ngai tih a sawi ve bawk.

Political party hruai­tute nena meeting an neih hnuah CM hian organisation - All Assam Students' Union (AASU), All Bodo Students Union (ABSU), All Assam Rabha Students' Union (AARSU) leh pawl dang hruaitute meeting a neihpui leh bawk a ni.