Manipur : Vote thlak ni sawn turin ngen ve leh

Manipur assembly inthlan neih tura inthlan thawh khatna neih ni tur, February 27 chu Pathianni a nih avangin Manipur MP hlui, BD Behring chuan Election Commission of India leh Chief Election Commission, Manipur hnenah ennawn a, a ni sawn turin a ngen ve leh.

Pathiannia vote thlak tura tih hi a hmain All Tribal Students' Union Manipur (ATSUM) pawhin sawiselin, a ni sawn turin an lo ngen tawh. Tribal zirlai pawl chuan Pathianni hi Kristiante tana ni pawimawh leh an ni serh a nih avangin, Kristiante rilru ngaih pawimawh sak loah election commission chu an lo puh tawh a ni.

MP hlui Behring chuan ECI leh CEO, Manipur hnenah open letter thawnin, Pathiannia vote thlak tir tum chuan Kristianten an duh lo tih a sawi. Pathiannia vote thlakna tur zingah hian hill assembly constituency pakua an tel tih sawiin, heng biala cheng tam ber hi Kristian an ni, a ti. Hei vang hian heng bial pakuaa inthlan neih tur a hi inthlan thawh hnihna neih hun, March 3-a sawn sak ve turin a ngen a ni. Hei hi Manipur mipui tinte dinhmun ngaihsak leh ram danpui zahawmna humhalhna pawh a ni nghal tih a sawi.

Thawhṭanni khan All Manipur Christian Organisation (AMCO) hruaitute pawhin CEO, Manipur hmuin inthlan ni hi sawn turin an lo ngen tawh bawk.