Tripura-in khuahkhirhna siam thar leh

Tripura sorkar chuan an state-a Covid-19 hri kai an pun belh zel avangin Thawhlehni khan khuahkhirhna khauh zawk a siam thar a, January 30 thleng hman a ni ang.

Shopping mall, multiplex leh hri darh theihna hmunte chu vawiin aṭangin khar tir vek an ni dawn tih information and cultural affairs minister Sushanta Chowdhury chuan a sawi.

Chowdhury chuan zanlam curfew, zan dar 9 aṭanga a tuk zing dar 5 thleng puan ṭhin pawh January 21 aṭangin zan dar 8-ah sawn hma a ni dawn tih a sawi. He thutlukna hi Thawhlehnia chief minister Biplab Kumar Deb hoa cabinet meeting-ah an siam a ni.

Minister chuan, "Ni sarih liam ta chhung khan hri kai thar 6,491 hmuh chhuah a ni a, hri vang hian mi 14 an thi bawk. State pum positivity rate chu 10.72% niin, Agartala Municipal Corporation area bikah 23.15% a ni mek bawk," a ti.

Tripura-ah hian Omicron variant kai hmuh an la awm lo a, mahse minister chuan hri a darh chak dan aṭang chuan Omicron kai an awm lo tih sawi ngam a ni rih lo tih a sawi. West Bengal-a National Institute of Biological and Molecular Studies-a Whole Genome Sequencing tura sample thawnte chu result an la dawng lo tih a sawi.