Lockdown pumpelh tur chuan 100%-in vaccine lak an ngai : Meghalaya Minister

Meghalaya health minister James Sangma chuan an state-a lockdown puan pumpelh tur chuan Covid-19 vaccine la thei chinten an lak kim vek a ngai tih a sawi.

Chanchinthar lakhawmtute a kawmnaah, Sangma chuan Omicron variant darh mek do letna kawng ṭha ber chu 100% in vaccine an lak a ni, a ti. State chhunga hri kai pung chho leh chu an rinlawk dan a ni a, hei hi an state-ah chauh pawh ni loin khawvel pumah pawh a kal dan a ni, a ti. Hemi rual hian hri darh zel tura laka invenna turin mipuite chuan kaihhruaina dan siamte ṭha taka an zawm theihna tura hmalak te, fimkhur theihtawpa an awmte a ṭul tih a sawi nghal bawk.

Minister chuan health department-in a theih angin mipuite zirtirna a pek reng thu a sawi. Covid kai primary contact, symptom nei lote pawh fimkhur a, inkhung hrang phawt turin a ngen a, hei hi hri do letna kawng awmchhun a ni, a ti.

Hetih lai hian eptu hruaitu, Dr Mukul Sangma chuan chief minister Conrad K Sangma chu Tura-a Police Parade Ground-a cricket tournament a huaihawt chungchangah Covid-19 protocol bawhchhiahah a puh a, mahse CM chuan a puhna hi a pha thung.