Nagaland tuilian vanga chhiatna siamṭhat nan vbch. 800 ngai

Nagaland chuan tunhnaiah ruahsur nasa avangin chhiatna nasa tak an tawk a, tuilian leh leimin an tuar nasa hle a ni.

Thla khat chhungin ruahsur in chhiatna a thlen avanga nunna chan mi 12 an awm a, chhungkaw 3000 velin an chenna in an chhuahsan bawk.

Hemi chungchangah hian Prime Minister Narendra Modi chuan Inrinni khan Nagaland Chief Minister Neiphiu Rio bia in tuilian vanga harsatna tawk te chu an theih ang tawka an ṭanpui dawn thu a hrilh.

Nagaland sorkar in thuchhuah an siamah chhawmdawlna atan cheng vaibelchhe 800 vel an mamawh thu an tarlang a, mi 12 in nunna an chan thu leh in 5000 vel a chhiat thu tarlangin mi 600 vel chu tun thlengin relief camp-ah an la awm tih an tarlang bawk.

Sorkar thuchhuah chuan mi nuai 2.6, an state mihring awm zawng zawng aṭanga 13% vel chu tuilian hian a nghawng tih tarlangin, thingtlang khaw 532 in an tuar tih a tarlang.

Thlai chinna hmun acre 5000 vel tuilian hian a tichhiat thu a tarlang bawk.

Johny Ruangmei, officer on special duty, Nagaland state disaster management authority chuan mipuite chuan buhfai leh chaw ei tur ṭha an mamawhna a sang hle tih a sawi a, engineering agency-te an state-a an kal a, an kawng chhia te khawl ṭha zawk hmanga an siamṭhat sak theih chuan an lawm hle dawn tih a sawi.

Nagaland hian Kerala tuilian tuar ṭanpui nan khan cheng vaibelchhe khat an pek tur thu an lo puang tawh a ni.