Manipur University vice-chancellor Pandey chawlh pek pawtsei

Manipur University (MU) chuan Thawhṭanni khan an vice-chancellor Adya Prasad Pandey hnena chawlh pek chu amah an puhna thubuai chhui zawh a nih hma chu a pawhsei sak.

Manipur University registrar (in-charge) Dorendrajit Singh chuan September 1 aṭang khan Prof. Pandey chawlh lak chu pawhsei a nih thu a sawi a ni.

Inrinni khan Pandey hian thuneitu zawng zawng hnenah joining letter thehlutin August 2 aṭanga ni 30 chhung chawlh pek a nih hunchhung chu a zawh tawh thu leh a hna a chhunzawm leh tawh dawn thu a hriatiir.

Hemi ni vek hian Manipur University Teachers’ Association (MUTA) leh Manipur University Staffs’ Association (MUSA)-te chungchang Manipur University Act 2005 hnuaiah ziahlan a nih loh thu sawiin an pawl din zui zel a khap nghal bawk.

Hemi anih avang hian MU community-te chu an thinrim hle a, Pandey chet lak dan chu August 16-a HRD Ministry nena inremna an ziak kalh a nih thu sawiin Pandey laka hremna lekkawh an duh thu an auchhuahpui ve nghal bawk. MU Community-te hian Thawhṭanni thlenga an thil phut hi tihhlawhtlin a nih loh chuan nawrh chhunzawm leh an tum thu an sawi nghal a ni.

HRD Ministry hian AP Pandey an puhna chhuizui tur hian Meghalaya High Court Chief Justice hlui T Nandakumar leh Tezpur University vice-chancellor hlui M K Choudhary-te kaihhruai committee a din a, September 6 hian an chhuina hi an ṭan dawn a ni. An inremna hi Union HRD Minister in a pawmpui hnuah MU Commu­nity-te chuan ni 85 zet an nawrh tawh chu August 22 aṭang khan chawlhsan lailawkin class pawh a pangngaia chhunzawm leh nghal a ni bawk.

University community, CSO, Meira Paibi group leh zirlai pawl ten Thawhṭannia MUTA office-a meeting an neihah chuan Pandey chu Varsity aṭanga dan an tum thu leh thuneitute chu boruak pangngai tawh a tihchhiat avanga a laka hremna lekkawh ngei tura an duh thu thuchhuah an siam.

Meeting chuan Inrinni-a Pandey-an official thuchhuah a siam nia a insawi chu thu awmze awm lo a nih thu sawiin, amah an chhuina chu an zawh hma chuan a thuchhuah siam chuan awmzia a awm lo tih an sawi.