Special exchange program a tel turin NDPP secy general thlang

Nagaland Nationalist Democratic Progressive Party (NDPP) general secretary Abu Metha chu United States of America sorkar in special ex­change program - “Regional Project for Asia Pacific, South & Central Asia” a buatsaih turah India aiawh turin a thlang.

He program hi Internatio­nal Visitor Leadership Program (IVLP) kaihhruaina hnuaia buatsaih niin, US sorkarin a senso zawng zawng a tum dawn thung.

IVLP hi 1940-a din kha niin US sorkar hnuaia international opinion leader professional exchange program pawimawh tak a ni bawk. He hunah hian khawvela mi pawimawh tak tak an lo tel tawh ṭhin a, India Prime Minister hlui boral ta Atal Behari Vajpayee pawh kha a lo tel tawh a ni.

IVLP-ah hian 1940 aṭang khan khawvel sorkar hrang hrang hotu lu mi 320 aia tam an lo tel tawh ṭhin a, he program in a tum ber chu United States leh khawvel ramdang ten inhriatthiam tawnna an neih theihna tur a ni.

Kuminah hian Asia Pacific ram 12-ten he program hi an chhim dawn a, he huna tel zawng zawng te hian an state leh tualchhunga sorkar kalpui a nihdan an sawi vek dawn bawk.

Indo-Pacific Strategy leh US Department of State Bureau of East Asia and Pacific Affairs, leh South and Central Asian Affairs kalpui a nih dan te pawh sawiho a ni dawn bawk a ni.

He huna tel tura Metha thlan a ni chu NDPP chuan an lawmpui thu an sawi a, he program aṭang hian hlawkna tam tak an neih phah ngei an beisei thu an sawi bawk.