Assam-Meghalaya border : State pahnih cabinet-te'n regional committee rawtna pawm

Assam leh Meghalaya state-ten ramri buaina an neih mek hmun 12 zinga hmun parukah inremna an siam thei dawn niin a lang ta.

State pahnih cabinet-te chuan ramri chungchang zirchiang leh enfiah tura regional committee an dinte rawtna thehluh chu Nilaini khan an pawm ve ve a ni. Hemi hnu hian sorkar laipuiah report thehlut a, union home minister Amit Shah hmu turin nimin khan Assam chief minister Himanta Biswa Sarma leh Meghalaya chief minister Conrad K Sangma-te chuan Delhi an pan nghal a, nizan khan meeting an nei a ni.

Meghalaya CM Sangma chuan regional committee rawtna siamte an pawm hnuah, ministry of home affairs-ah hma lak zui turin an thehlut dawn tih cabinet meeting zawha an kawmnaah a sawi. Assam sorkar lam pawhin hetiang bawk hian rawtna hi an thehlut ve dawn bawk a ni.

Ramri hmun paruka thingtlang khaw 36 chungchangah state pahnihte chuan inremna an siam mai thei a, mahse a ramri tak chu Parliament-in a siam a ngai a ni, tiin Sangma chuan a sawi. Parliament level-a tih a ngaih avangin Survey of India pawh heng hmunah hian kalin, joint inspection neih pawh a ṭul maithei tih a sawi bawk. Regional committee-te chuan ramria khuaate hi an tlawh kim vek a, tualchhung mite pawh an kawm kual hlawm tih a sawi bawk.

Assam chief minister Himanta Biswa Sarma pawhin ramri buaina chinfelna tura an inbiakna chuan rah ṭha tak a chhuah ṭan tih a sawi. Ramri buaina chinfel a nih theihna tura an buaipuinaah stakeholder hrang hrangte kawm kualin, state pahnih aiawhten meeting pawh vawi eng emaw zat an nei a, ramrite pawh tlawhin tualchhung mite pawh an kawm fo tih a sawi.

State pahnihten hmun paruka ramri buaina an neih mek hi sq km 36-a zau niin, heng hmunte hi a zaha insem an tum a ni. Hmun paruk danga buaina an neih pawh a tahtawla chinfel leh an tum bawk.

Assam leh Meghalaya hian ramri buaina hi kum 50 zet an nei tawh a, mahse state pahnih Chief Minister-te chuan an buaina hi chinfel tumin hma an la a, hun rei tak hruaitu dangten an lo tihpuitlin theih tawh loh chu an tithei dawn ta niin a lang. Hetih lai hian hmun dang paruka an buaina chu a khirh deuh avangin chingfel tur chuan hun pawh a la duh deuh dawn a ni.