PLA-te'n Arunachal tleirawl ru bo

21st January, 2022

Arunachal Pradesh-a Upper Siang district-a Bishing aṭangin mipa tleirawl kum 17 mi Miram Taron chu China sipai, People's Liberation Army (PLA) ten an rubo nia sawi a ni.

Hemi chungchang hi Nilaini khan Arunachal Pradesh Lok Sabha MP Tapir Gao chuan a sawichhuak a, he tleirawl hi Thawhlehni khan India ram chhung aṭangin rukbo a ni, a ti. China sipaiten an rukbo hi Zido khuaa cheng a ni.

Gao chuan Taron rukbo a nih thu hi a ruala sipaiten an rukbo ve tho, mahse tlanchhuak thei a ṭhian pakhatin a sawi tih a tarlang. "Siyungla area-a Bishi khuaa ramhnuaia a ṭhianpa nena an kal chu an rubo a, he thil hi India ram chhung ngeia thleng a ni," a ti.

Bishing hi Sino-India border-a India ram china khaw awm hnuhnung ber niin, Upper Siang district headquarters Yingkiong aṭanga km 260 vela hlaa awm a ni.

MP Gao chuan tleirawl rukbo a nih thu hi union minister of state for home, Upper Subansiri deputy commissioner leh official dangte pawh hriattir nghal an nih thu a sawi bawk. Prime minister Narendra Modi, home minister, defence minister, Arunchal Pradesh chief minister leh deputy chief minister-te chu he tleirawl chhuah a nih thuai theihna tura chak taka hma la turin a ngen bawk.

China sipaite hian a hma pawhin Arunachal mi an lo rubo tawh bawk a ni. Kum 2020, September thla khan Upper Subansiri district-

a Nacho-ah ram vaka chhuak, tleirawl panga chu PLA te hian an lo rubo tawh a ni. He thil thleng vang hian Indian Army chuan China lam hi thu an thawn nghal a, a hnuah heng mi pangate hi Indian Army kuta hlan an ni.

Rahul-a'n sorkar laipui sawisel
China sipaiten Arunachal tleirawl an rukbo hnua BJP kaihhruai sorkar laipui a ngawi reng chu Congress hruaitu Rahul Gandhi chuan a sawisel nghal.

Ningani khan Rahul hian hemi chungchang hi a twitter-ah tarlangin, Republic Day lawm hma lawkin China chuan India mi an rukbo, Miran Taron chhungte kan rilruah kan hre reng a, kan tlawm mai dawn lo a ni. Hetih lai hian he thil hian Prime Minister a tibuai pha lo a, engmah sawi ngai loin a ngawi zui tlat a ni, a ti.