Manipur University Vice-Chancellor in a hna chhunzawm
Manipur University(MU) Vice Chancellor Prof. Adya Prasad Pandey chuan Thawhlehni khan University Vice Chancellor a nihna chu a chhunzawm leh tawh dawn thu sawiin, a chawlh pawhseisak a nihna lehkha pakhatmah a dawng lo tih a sawi.
A Sanjenthong quarter-a media miten an kawmnaah Pandey chuan September 1 aṭang khan a hna a chhunzawm leh tawh thu sawiin ni 30 chhung chawlh an pek chu a zo tawh tih a sawi. A office a inkalh avangin a official quarter-ah camp office a hawng tih a sawi bawk.
Hetihlai hian Thawhṭanni khan university registrar (in-charge) Sh. Dorendrajit Singh chuan September 1 aṭang khan Pandey-a chawlh chu pawhsei sak a nih thu a sawi thung a, zirlaiten an puhna chhuina hna zawhfel a nih hma chuan chawlhtir hrih a ni dawn tih a sawi.
Thawhlehni-a a chenna, Officers’ Colony-a news conference a neihnaah Pandey chuan Inrinni khan joining letter pawh thuneitute hnenah a thehlut tawh tih a sawi. Chawlh a la leh dawn a nih chuan official lehkha a dawn leh hunah thutlukna a siam dawn chauh tih sawiin amah chhuitu committee-te chuan engvangin nge ni 30 chhungin amah chhui hna chu an zawh loh tiin zawhna a zawt let a ni.
A office inkalh chungchangah pawh hian director-general of police hnenah complaint a thehlut tawh tih a sawi a, chhui an tumna pawh chu a pawm vek thu sawiin CBI in chhui chiang dawn pawh ni se a inpeih thu a sawi. Tuna chhuitu committee chairman chu Manipur University Teachers’ Association thupuangtu laina hnai tak a nih avangin a tan chuan committee chu rin a harsat thu a sawi bawk.
Pandey chungchang chhuitu committee hi Meghalaya High Court Chief Justice hlui T. Nandakumar leh Tezpur University Vice-Chancellor hlui M.K. Choudhary-te chuan an kaihruai a ni.
University Community te chuan VC Pandey hi chhuak tura nasa taka nawrin May thla aṭang khan nawrh an huaihawt a, ni 80 chuang zet University pawh khar a nih hnuah Union HRD Ministry leh University Community ten inremna an siam avangin August 23 aṭang khan an nawrh hi an titawp ta a ni.