Meghalaya: GSMC in Garoland bill state Assembly-a pharh duh

Meghalaya-a Garo Hills State Movement Committee (GHSMC) chuan an state Assembly session awm leh turah Garoland State Bill pharh an duh thu an tarlang.

September 1-a Rongram Community Hall-a general executive meeting an neihah committee chuan an hming thlakin 'H' awmna paiha Garoland State Movement Committee tih an nih tawh dawn thu an sawilang bawk.

GHSCM chairman Nikman Marak chuan an hming aṭanga 'Hills' tih paih tura thutlukna an siam thu leh Garo tih pawh chu Garoland tia thlak tura thutlukna an siam thu a sawi.

Committee chuan Chief Minister Corad K. Sangma hnenah Garoland State Bill chu Assembly leh hunah chuan pharh nghei tawh tura ngen turin thutlukna an siam a ni.

Nikman chuan November thlaah hian state khawpui Shillong-ah public rally buatsaih an tum thu a sawi a, Union Ministry of Affairs, New Delhi hnenah RTI file-a Garo Hills District map dik tak British surveyor Late Kelso, 1849 -1850 leh W.O.A Beckett, 1872 ten an ziah chu haichhuah leh an duh thu a sawi. RTI aṭanga an thil hmuhchhuah aṭang chuan dan anga hma an lakzui dawn thu a sawi bawk.

GHSMC hian state hran ngiat in hun rei tak chu sorkar an nawr tawh a, an hmalak zelna atan hian chhungkaw tin hnenah thla tin cheng khat khawn an tum bawk a, heihi an hmalakna an chhawmnun zel theih nana ti an nih thu an sawi bawk a ni.