Central team in Nagaland tuilenna hmun tlawh
Sorkar laipui aiawh mi panga te chuan Thawhlehni khan Dimapur thlengin ruahsur nasat avanga Nagaland in chhiatna a tawhna hmun hrang hrang an tlawh.
Inter Ministerial Central Team hi K. B Singh, joint secretary, Ministry of Home affairs chuan kaihruaiin Director in-charge Dept of Agriculture and Cooperation, Kolkota, Dr. K. Manohoran, Consultant FCD, Department of Expenditure New Delhi, R.B.Kaul, Ministry of Road and Transport and Highway Guwahati, Anirban Acharya leh Ms. Chahat Singh, department of Rural Development, New Delhi-te an kal a ni.
State sorkar official-te chuan sorkar laipui aiawh te hian Dimapur-a tuilianin chhiatna a thlenna hmun te chu Thawhlehni khan an tlawh nghal tih sawiin loneimite nen pawh inkawm hona hun an hmang nghal tih a sawi. Khua a chhiat avangin tuilianin a nghawng nasatna lai ber hmun nia sawi Kiphire area erawh an tlawh thei hrih lo niin a sawi bawk.
Inbiak pawhna lamah harsatna nasa tak an tawk tih sawiin lei eng emaw zat a chim tih a sawi a, state sorkar chuan an tuilianin a tihchhiat te siamṭhat nan cheng vaibelchhe 800 vel a mamawh tih a sawi a ni.
Nagaland-ah hian thla khat chhungin tuilian vangin min 12 in nunna an chan a, chhungkaw 48,821 leh thingtlang khaw 532 in an tuar bawk. Kawngpui ṭhenkhat phei chu kaltlang theih lohin a awm a, Dimapur leh Kohima inkalpawhna pawh a ping hial a ni.
Nagaland tuilian tuarte ṭanpuina tur hian Bollywood actor Sushant Singh Rajput chuan cheng vaibelchhe 1.25 a pek dawn thu a sawi.
Thawhlehni khan he thu hi Chief Minister Neiphiu Rio hnenah hrilhin tuilian tuarte chhawmdawlna atan hian Chief Minister Relief Fund-ah cheng vaibelchhe 1.25 hi a pek dawn thu a sawi a ni.