AP: Modi sorkar chu Tuialhthei hmanga mipuite rawkah puh

Arunachal Pradesh Congress Committee Pre­sident Takam Sanjoy chuan Thawhlehni khan BJP kaihhruai NDA sorkar chu sawiselin PM Narendra Modi kaihhruai sorkar chuan tuialhthei man sang tak hmangin mi­puite an rawk tih a sawi.

MP hlui Sanjoy chuan tuialhthei man pangngai chu khawvelah pawh barrel khat US dolar 1.17 a nih thu sawiin India ramah chuan litre khatah dollar 1.16 a nih thu a sawi. Ram zawng zawng chuan tuialhthei hi man inang veka an lei thu leh anmahni ram ṭheuhah chhiah leh subsidy-te an duh angin an ti danglam ve leh ṭhin tih a sawi bawk.

India ramah hian tuialhthei man hi a san em avangin Thawhṭanni pawh khan BJP MP Subramaniam Swamy chuan sorkar laipui chu a man tihniam turin a lo ngen tawh nghe nghe a, cheng 48 aia to chu man uchuak tak a nih thu a lo sawi tawh a ni.

Sanjoy chuan DMK pre­si­dent MK Stalin pawhin tuialhthei man sang chu nasa taka a sawisel thu sawiin sorkar laipui chu hemi chungchanga ngawi rengah leh hma la duh loah a puh tih a sawi bawk.

Arunachal sorkar chu tuialhtheia tualchhung chhiah lak leh VAT tihniam turin a ngen bawk a, state chhunga inkalpawhna atan lirthei chu an hman ber a nih si avangin hma an lak a ngai a ni, a ti.

Sorkar chuan hei hi an tih­lawhting lo a nih chuan Cong­ress chuan hma an la dawn tih sawiin sorkar laipuiin 'acche din' hminga mipuite an rawk dan chu insawifiah turin an ti dawn tih a sawi.