HRD Ministry in MU VC chung changah President biak a tum

Manipur University in an vice-chancellor Adya Prasad Pandey hna zawm avanga buaina an tawh leh mek avangin Human Resource Development (HRD) ministry chuan Pandey-a chawlh pek chhunzawm a nih theih nan President biak an tum tih an sawi.

Thawhlehni khan Ministry chuan thuchhuah siamin boruak tih daih dan tur an ngaihtuah tih an sawi a, President chu central university zawng zawnga visitor a nih avangin Pandey-a chawlh pawhsei a nih leh theihna turin biak an tum thu an sawi. Ministry chuan a ṭul a nih phei chuan ban hial turin an ngen dawn tih an sawi.

AP Pandey hi BHU-a Economics department HoD ṭhin a ni a, October 2016 aṭang khan Manipur Univsersity VC ni tura ruat hi a ni. University Community-te chuan Pandey chu a office-te night club ang maia hmangah an puh a, university pawisa hmanga nasa taka zinkualah puhin office a kal ṭha lo hle niin an sawi bawk a ni. Hemi bakah hian car man to tak leia puh niin contract hna ruakah te pawh a duhsak zawng a thun mai zel niin an sawi a, hemi anih avang hian bang turin an phut a ni.

May 30 aṭang khan nawrh huaihawtin ni 80 chuang lai mai University hi khar a nih hnuah HRD Ministry leh MU Community-te chuan inremna an siam avangin August 22 aṭang khan University hi hawn a ni leh ta chauh a ni.

Manipur Chief Minister Biren Singh pawhin Pandey chawlh tir hrih chu thil ṭul nia a hriat thu a sawi ve bawk.