Manipur-a rorellai MLA 9-in Sorkar thlawpna an hnukdawk

Manipur-a BJP kaihhrui ṭangrual sorkar thlawptu MLA pakuain Nilaini khan sorkar thlawpna an hnukdawk. 

MLA hel pakuate hi BJP MLA pathum, NPP MLA pali bakah Trinamool Congress MLA pakhat leh Independent MLA pakhat an ni. An zingah hian deputy chief minister Y Joykumar Singh bakah minister pathum an tel a ni. 

Seat 60 awmna, Manipur Assembly inthlan hnuhnung ber, kum 2017-a neihah khan Congress chu party mala seat la hnem ber niin MLA 28 a nei. Mahse seat 21 neitu, BJP chuan NPP leh NPF MLA pali ve ve, LJP pakhat, TMC pakhat leh independent MLA pakhat bakah Congress MLA pakhatin an thlawp avangin ṭangrual sorkar an din a ni. Chief minister N Biren Singh kaihhruai sorkar a din hnuah Congress MLA pasarhin an zawm ve leh bawk a ni. 

MLA pakuain sorkar thlawpna an hnuhdawk tak avangin BJP sorkar hian thlawptu 23 chauh a nei tawh dawn a, sorkar a siam zui zel thei dawn lo a ni. Hetih lai hian Congress chuan member 20 a nei mek a, MLA hel pakuate hian an thlawp chuan MLA 29 a nei thei ang. 

BJP zawmtu Congress MLA pakhat chu disqualify a nih bakah, MLA hel pasarihte chu court-in Rajya Sabha member tur thlanna turah pawh Assembly-a an luh a khapsak tawh bawk. Hei vang hian Assembly-a member tam zawng hi 52 a ni mek a ni.

Eptu party, Congress chuan Congress kaihhruai ṭangrual sorkar an siam dawn tih an sawi.  Party hruaitu, ṭum thum chief minister dinhmun lo chelh Okram Ibobi Singh, NPP Leh TMC hruaitute chuan nizan khan Governor Najma Heptulla an hmu a, CM Singh kaihhruai sorkar fiah a nih theihna turin Assembly special session ko turin an phut. 

Eptu MLA 12-te chuan nimin vek khan Manipur Assembly secretary hnenah Assembly speaker Yumnam Khemchand ban tura phutna lehkha an thehlut nghal bawk a ni. 

Manipur-ah hian vawiinah Rajya Sabha member thlan a ni dawn bawk a, BJP leh Congress hian candidate an siam ve ve a ni. BJP thlawptu MLA pakuate an inhnuhdawk tak avangin Congress candidate T Mangibabu chu a tlin rin a ni.