Assam party-te'n Meghalaya nena ram inthleng duh lo

Assam-a political party eng emaw zat chuan Assam leh Meghalaya sorkarten ramri buaina chinfelna turah, give and take policy hmanga border area-a ram inthleng an rawtna chu an duh lo.

State pahnihte hian ramri hmun paruka buaina an neiha inremna siamna turah a hmawr an bawk hnai tawh hle. Ramri dinhmunte buaipui tura an din, regional committee-te rawtna siam pawh state pahnih cabinet-te chuan an pawm ve ve tawh. Kar liam ta Ningani khan Assam chief minister Himanta Biswa Sarma leh Meghalaya chief minister Conrad K Sangma-te chuan Delhi-ah union home minister Amit Shah an hmu bawk. Amit Shah hnenah hian regional committee-te report an sawipui a ni.

Regional committee-te rawtna siamah chuan, an buaina neih mekna border area paruk, a vaia sq km 36.79 a zau chu state pahnihte hian insemin, Assam lamin sq km 18.51 leh Meghalaya lamin sq km 18.28 chang turin an ti a ni.

State cabinet-ah pawm tawh mah se, Assam-a eptu pawl hrang hrangte chuan inremna siamna atana border area-a ram inthleng tawn ringawt chu an duh lo tih an sawi. Eptu party lian pahnih, Congress leh All India United Democratic Front (AIUDF) chuan state sorkar hnenah hmanhmawh taka thutlukna siam lo tur leh, Meghalaya ram inthleng tur chungchang chu kimchang taka Assembly-a sawiho phawt an phut.

Raijor Dal president Akhil Gogoi pawhin Assam lam chuan tu ram mah a luahsak lo a, Meghalaya zawkin Assam ram tho a rawn a pe dawn tihna a ni tih a sawi. Hetiang bawka ramri buaina an neih mekna hmun dang parukah pawh inremna a siampui leh a nih chuan Assam chuan a ram zau tak a hloh thei dawn a ni, a ti.

Assam Jatiya Parishad president Lurinjyoti Gogoi chuan Assam sorkar chuan ramri hrula chengte duhdan a thlir sak lo a ni, a ti. An rawtna siam anga ram inthleng an tih chuan Assam chuan a ram chu Meghalaya hnenah a pe dawn a, Meghalaya chuan Assam ram vek a rawn pe dawn a ni, tiin a sawi.