PLA-ten Arunachal tleirawl bo an hmu

Arunachal Pradesh tleirawl, January 18-a Line of Actual Control (LAC) bula chin hriat loha bo chu China sipai, People's Liberation Army (PLA) chuan an hmu tih sawiin, nimin khan India sipaite an hriattir.

Arunachal tleirawl Miram Taron (17) hi a ṭhian pakhat nena ramvaka an kal chu Upper Siang district-a LAC bul, Bishing khaw bul aṭangin PLA hian an rubo a, a ṭhianpa hi chu a tlanchhuak thei nia sawi a ni. Mahse Chinese foreign ministry chuan he thil thleng hi an hriat loh thu sawiin, PLA te chuan dan loa an rama lut leh chhuakte vengin ramri chu khauh takin an enkawl tih a sawi.

Tezpur Defence PRO Lt Col Harshvardhan Pandey chuan PLA-ten he tleirawl hi an hmu tih an hrilh thu leh, India lama hruai kir a nihna tur pawh buaipui nghal a nih thu a sawi.

Arunachal Pradesh Lok Sabha MP Tapir Goa pawhin PLA-ten Taron an hmuh thu hi a sawi ve bawk.