Assam : Hri kai pung zel vangin R-Day lawmna tinep dawn

Assam sorkar chuan an state-ah Covid-19 an pun leh nasat avangin January 26-a Republic Day lawmna neih tur pawh a tinep dawn. Republic Day puala a hma leh a hnu lama lawmna buatsaih khap a ni bawk.

Republic Day lawmnaa parade leh march pass neihnaah school naupang tel tir an ni dawn lo. Parade ah hian trained police, security personnel leh homeguard, vaccine dose kima la tawh chauh an tel dawn tih Assam State Disaster Management Authority chuan a sawi.

Programme-ah hian puanzar pawhpharh, khuallian thusawi leh ceremonial parade chauh telh a ni. Cultural programme, prize/award semte chu kumina R-Day lawmnaah hian telh a ni lo.

State chhunga R-Day lawmna pui ber, Guwahati-a neih turah chuan mi 1,000 chin an kal phal a ni a, district level-ah mi 500 chin an tel phal a ni.

Assam-ah hian hri kai an pung leh nasa tawh hle a, Inrinni khan hri kai thar 5,580 awm belhin mi 13 in an thihpui bawk. Covid-19 kai hmuhchhuah mi 6,90,534 an awm tawh a, active case 49,017 an nei mek. Hripui vanga thi hi 6,288 an awm tawh bawk.