Tripura-ah hri kai 1,138 an awm tawh

Tripura-ah Nilaini khan hri kai hmuh chhuah thar mi 43 an awm a, an zinga mi 39 chu Border Security Force (BSF) sipai an ni. Hri kai hmuh tawh hi mi 1,138 an awm tawh a ni. 

Nilaini khan sample 1,395 test niin, positive hmuh chhuah mi 43 zinga pali chu hmun danga zinchhuahna nei an ni. BSF zingah hri kai hi mi 202 an awm tawh bawk. 

Chief minister Biplab Kumar Deb chuan hri kai enkawl dam mi 123 an awm belh leh a, heng mite nen enkawl dam hi mi 556 an tling tawh a ni, a ti. Recovery rate hi 50.78% a ni. 

Tripura-ah hian sample 51,729 test ni tawhin, sample 50,230 result hriat a ni tawh. Sample test rate nei ṭha ber zingah telin, mi maktaduai khatah mi 12,565 test neihsak ang an ni.