MUSU in nawrh chhunzawm leh

Manipur University Students’ Union (MUSU) chuan Ningani aṭang khan an vice-chan­­cellor, Adya Prasad Pandey chhuahtir tura nawr turin nawrh an huaihawt leh ṭan tih an sawi.

Manipur University hi ni 85 zet khar a nih hnuah August 22 khan HRD Misnistry leh MU Community ten inremna an siam avangin hawn ṭan leh a ni a, mahse Ningani aṭang khan nawrh hi an chhunzawm leh ta a ni.

Buaina a punlun zel avangin AP Pandey hi August 2 aṭang khan ni 30 chhung chawlh pek a ni a, Inrinni liamta khan a hna a chhunzawm leh tawh dawn thu a sawi. Inrinni vek hian Manipur University Teachers’ Association (MUTA) and Manipur University Staffs’ Association (MUSA)-te chu Manipur University Act 2005-ah an din phalna chungchang a inziak lo tih sawiin din phal a nih tawh lo thu a sawi nghal a ni.

Hemi anih avang hian MU Community-te chu an lungawi lo hle a, Pathianni khan nawrh an huaihawt leh dawn tih an tarlang nghal.

Nilaini khan MUSU general secretary Laishram Kennedy chuan Pandey leh registrar (in charge) nia inchhal M. Shyamkesho-te chu rilru lama harsatna nei, Manipur dodal tu an nih thu a sawi.

Chief Minister N. Biren Singh leh thuneitu dang pawhin Pandey-a dodal zawnga thu an nei lo chu mak an tih thu sawiin, Pandey erawh chuan August 16-a an inremna siam dodal zawngin thu a sawi thung niin a sawi bawk.

MUSU chuan Chief Minister leh a council of Minister bakah official dang inremna an ziah laia awm te chu an nihna kalsan turin an ti a, hruaitu nih an tlin lo niin an sawi a ni.

Pandey hian Thawhlehni khan official lehkha a hmu a nih loh chuan chawlh a lak dawn loh thu a lo sawi tawh bawk a, chhuichian a ngam thu te pawh sawiin NIA pawhin chhui se a inrin reng thu a sawi tawh bawk.