AAPSU-in Ni 12 chhung Lockdown puang

All Arunachal Pradesh Students Union (AAPSU) leh All East Siang District Students Union (AESDSU) chuan hri leng avangin Pasighat municipal area-ah ni 12 chhung, June 19-30 thleng lockdown an puang. NGO dangte pawhin hei hi an thlawp bawk a ni. 

AAPSU chuan Ni­lainia press conference  neiin, Pasighat-a frontline worker pahnihin Covid-19 an kai avangin, East Siang district-a hri leng dona kawnga hma la tu pawl hrang hrangte nena meeting an neihnaah lockdown puan hi an rel tih an sawi. 

AAPSU vice pre­sident (Admin) Meje Taku chuan mipuiah hri a darh a hlauhthawnawm thu sawiin, thuneitute hnenah contact tracing pawh uluk taka ti nghal turin an ngen tih a sawi. 

Arunachal Pradesh-ah hian Nilaini khan hri kai mi pali hmuh chhuah belh an ni a, hri kai hmuh tawh hi mi 99 an ni. An zinga pasarih chu enkawl dam an ni tawh a,enkawl mek mi 92 an awm a ni. 

Hri kai hmuh tharte hi quarantine center-a awm lai vek niin, asymptomatic vek an ni bawk.