Covid-19 vaccine la vek tura tihna duh loin Kohima-ah 'Freedom Rally' buatsaih a ni

Sorkarin Covid vaccine la vek tura a tihna chu duh loin, Pathianni khan Nagaland khawpui Kohima-ah 'The Watchman' leh Awaken India Movement (AIM)-te chuan 'Freedom Rally' an buatsaih.

Kawngzawhah hian kohhran, civil society leh political party hrang hrang mite an tel a, banner leh placard-te kengin, 'Zalenna chu Pathian pek, tuma dan theih loh", 'Vaccine lak chu mimal duhthlanna', 'Kan dikna chanvo rahbehsak kan duh lo', 'Innawr luihna kan duh lo' tihte an tarlang.

Rally zawh hian Nagaland chief minister Neiphiu Rio hnenah memorandum thehlutin, 'Vaccine lak chu mimal duhthlanna a ni a, tumah nawr luih a ni tur a ni lo' tih an sawi. State chhunga puitling leh naupangte vaccine la veka sorkarin hriattirna a lo tihchhuah tawhte pawh sut leh vek turin an phut a ni.

Kohima-a rally buatsaih hi political party thar 'Rising People's Party' bakah Naga zirlai pawl lian ber, Naga Students' Federation chuan an thlawp a ni.