Assam police-ten zirlai pawl hruaitu hlui kap hliam CM-in thil thlen dan chhui chiang turin thupek tichhuak

Assam zirlai pawl hruaitu hlui, kum 22 mi Kirti Komal Bora chu kar liam ta Inrinni tlai khan Nagoan district-a Kachalukhua-ah police-ten silaiin an kap hliam. He thil thleng chungchang hi chhui chiang turin chief minister Himanta Biswa Karma chuan thupek a tichhuak nghal a, Additional Chief Secretary awmna one-man inquiry commission din nghal a ni.

Zirlai pawl hruaitu hlui kah anih chungchangah Assam-a BJP sorkar leh Assam police-te sawiselna a nasa nghal hle. Bora chhungte leh zirlai ṭhenkhatte chuan Nagaon police station kawtah lungawi lohna lantirin, silai hmetpuaktu chhui a, hremna pe turin an phut.

Assam police-te chuan AASU member leh, Nagaon College zirlai pawla general secretary hlui, Kirti Kamal Bora hi ruihhlo zawrhnaah inhnamhnawihah an puh a, police-te beih a tum chu invenna atan an lo kap niin an sawi. Mahse an thusawi hi mi tam takin an pawm lo a, AASU pawhin police zuruiin tlangval an vuak lai a va sawisel leh inrawlh avangin an buai zui a, police-te hian Bora zawk chu an bei zui niin a tarlang. Bora hian a mal vei lam, kut vei lam leh a chalah hliam a tuar.

CM chuan Pathianni khan he thil thleng hi Additional chief secretary Paban Borthakur-a'n a chhui dawn thu leh, ni sarih chhunga report thehlut tura tih a nih thu a sawi. "Police-te chu thil sual titute lakah na takin an che tur a ni a, mahse pawisawi lo leh misualte tan ṭhianṭha tak an ni tur a ni. He thil thlengah hian police lamin an ti dik lo a nih chuan na takin an chungah action lak a ni ang," a ti.