Hmarchhak hmun hrang hrangah Tuialhthei man sang dodal

Tuialhthei man sang zel chu ramchhung hmun hrang hrangah dodalna a nasa hle a, hmarchhakah pawh hmun eng emaw zatah tuialhthei man sang duh lohna lantir tum a ni.

Arunachal Pradesh:

Arunachal Pradesh Congress Committee (APCC) chuan vawi­in chawhma dar 9 aṭanga tlai dar 3 thlengin state pumah bandh huaihawt an tum.APCC chuan hei hi All India Congress Committee in ramchhunga petrol leh diesel man sang zel a dona kawnga a thlawpna a nih thu an sawi.

Congress in bandh an huai­hawt tur hi NGO hrang hrang leh political party dang, tuialhthei man sang duh lotu te chuan an thlawp dawn thu an sawi ve bawk. Tuialhthei man san avang hian state chhunga lirthei hmanga veivah man pawh a san phah a, mi nawlpuiin harsatna an tawh phah niin APCC thuchhuah chuan an tarlang.

APCC chuan bandh hian emer­gency service, paramilitary leh police-te bakah magistrate duty te leh press mi te chu a huam dawn lo tih an tarlang bawk.

APCC president Takam Sanjoy chuan political party zawng zawng leh NGO zawng zawng, chamber of commerce leh market welfare associations-te chu BJP sorkar vanga tuialh­thei man sang dodalna kawnga thlawp turin a ngen a ni.

Tripura:

Tripura Congress Party pawhin vawiin chawhma dar 9 aṭanga tlai dar 3 thleng hian state pum huap bandh an huaihawt dawn thu an sawi.

Zirtawpni-a Congress Bha­wan-a press meet an neihah Tripura Pradesh Congress Chief Birajit Sinha chuan All India Congress Committee hmalakna thlawpin bandh hi an huaihawt dawn thu a sawi a ni.

Tripura Bharatiya Janata Party (BJP) chuan Congress-in Bandh an huaihawt tur hi an duh lo hle a, Congess party hmalak dan dik lo tak niin an puh.

State BJP Vice President, Subal Bhowmik chuan bandh huaihawt tum chu awmze nei lo leh bulfuk nei lo niin a puh a, Tripura-ah chuan Congress chu mipuiin an hnawl tawh thu leh vawiinah pawh hian boruak engkim chu a pangngai vek dawn thu a sawi. Bandh chu a hlawh­chham dawn niin a sawi bawk.

Tripura-a eptu pawl CPI(M) chuan bandh hi an thlawp dawn leh dawn loh an la sawi lo thung.

Meghalaya:

Meghalaya Congress chuan rampuma Congress party ten tuialhthei man sang zel an dona kawnga a thlawpna lantir nan Meghalaya Pradesh Mahila Congress-te chu Inrinni khan Congess Bhavan-ah an pungkhawm.

Bhavan-a pungkhawm te hian thuziak te kengin BJP-kaihhruai NDA sorkar chuan tuialhthei man sang zelah mawh a phurh thu aupuiin an dodalna thu te an auchhuahpui a ni.

State Mahila Congress president Joplin Scot Shylla chuan Narendra Modi chuan mipuite a rawk niin a sawi a, India mipuite a bum a ni, a ti. A thutiam zawng zawng a bawhchhia nia puh bawkin, Demonetisation hnuah black money a tihboral dan chu khawiah nge? tiin zawhna a zawt a ni.

Mahila Congress chief chuan sorkar laipui chuan England leh Australia-ah te petrol litre khatah cheng 37 in a hralh tih sawiin, mahni ramchhungah ngei erawh cheng 78-79 ten an hralh thung a ni, a ti.

Shylla chuan tuialhthei man sang chuan mipuiteah nasa takin nghawng a nei tih a sawi a, chhungkaw tinin harsatna an tawh phah niin a sawi bawk.

Congress chuan Chief Minister Conrad Sangma hnenah petrol-a VAT an lak titawp tura an ngen dawn thu an sawi a ni.

Shylla chuan Narendra Modi sorkar hnuaiah hmeichhia te an him lo hle tih sawi bawkin, nitinin hmeichhia te laka pawikhawihna thleng chu a hluar telh telh niin a sawi bawk.