Bharat Bandh in hmarchhakah nunphung tibuai

Indian National Cong­ress (INC) leh Left Party te huaihawtin BJP sorkar hnuaia tuialhthei man sang zel duh lohna lantirna atana rampumah Bharat Bandh huaihawt a ni a, hei hian hmarchhak hmun hrang hrangah pawh nunphung a tibuai hle a ni.

Assam:

Assam-ah bandh huaihat vanga lirthei tlanchhuak an tlem avangin mipui tan veivah a harsa hle a, dawr tam tak a inkhar avang leh petrol pump-te khar a nih avangin state khawpui Guwahati-ah chuan nunphung a buai hle. Hetihlai hian private school leh college ṭhenkhat erawh chu hawn a ni thung.

Thawhṭanni zingah kha chuan dawr ṭhenkhat chu hawn ni mah se khar luihtir an ni bawk.

Manipur:

Manipur-ah chuan Chief Minister hlui Okram Ibobi Singh-a hoin Congress party te hian kawng an zawh a, Imphal-ah chuan bazar hmun zawng zawng khar a nih bakah distrct dang pawhin an bazar hmun te an khar ve bawk.

Lirthei tlan hmuh tur a awm lo a, mi ṭhenkhat chuan motor tyre-te hal in kawngpui an dang a ni.

Hmun ṭhenkhatah chuan police-te leh Congress mite an innawr buai nia sawi a ni bawk.

Congress MLA Mirabai chuan petrol, diesel leh mamawh dang man sang zel an dodal thu sawiin sorkar pawhin thil man an tihniam ngei tur a ni, a ti.

Tripura:

Tripura-ah chuan Bharat Bandh thlawptu mi 400 vel state chhung hmun hrang hrangah man an nih thu police-te chuan an sawi.

Congress leh Left Party-te kaihhruaina hnuaia bandh huaihawt tum chuan an state chhungah chuan nghawng liantham a nei vak lo niin police officer pakhat chuan a sawi a ni.

Sorkar office-te chu dan pangngaia hawn a nih thu Officiating AIG (Law and Order) Subrata Chakraborty chuan a sawi bawk.

Chakraborty chuan tharum thawhna engmah thleng a awm loh thu sawiin, bandh huaihawt tum mi 400 vel chu state chhung hmun hrang hrangah report a awm thu a sawi a ni.

Sumdawnna hmun ṭhenkhat erawh khar a nih thu a sawi a, nunphung pangngai erawh a tibuai hran lo niin a sawi.

Hetihlai hian state Congress president Birajit Sinha chuan mipuiin bandh hi an thlawp ṭhat thu a sawi thung a, anmahni thlawp tu an man te chu BJP thuneitute chuan an vau nia sawin an vauna chuan awmzia a nei lo niin a sawi thung.

Meghalaya-ah hlawhtling lo:

Bharat Bandh hi Meghalaya-ah erawh a hlawhtling lo hle nia sawi a ni a, Khyndai Lad, Shillong-ah Congress chuan tuialhthei man sang zel an duh lohna lantir mah se awmzia a nei thui vak lo niin an sawi.

Meghalaya-ah hian Congress hian bandh hi an huaihawt thei lo nia sawi a ni a, tuialhthei man sang zel duh lohna lantirna atana punkhawmna an huaihawtah hian Cogress hruaitu eng emaw zatin thu an sawi a ni.