AMSU in NH an dang

All Manipur Students’ Union (AMSU) chuan Inrinni zan aṭang khan darkar 100 chhung National Highway 37 an dang a, hei hi Imphal leh Silchar inkalpawhna kawngpui ber a ni. AMSU hian NSCN (Isak-Muivah) camp Manipur aṭanga nawrchhuah vek phutin kawngpui hi an dang.

Inrinni zan zanlai aṭang khan kawngpui hi an dang ṭan a, Imphal-Jeribam inkar kawngah chuan lirthei tam tak an tangkhang tawh nghe nghe.

September 3 khan Naga hel pawl, NSCN-IM hel pawl mi nia inchhal mi pali te chuan AMSU zirlai te leh an zaithiam hruaite chuanna bus tidingin pawisa an dil a, mi ṭhenkhat kutthlak zuiin kut an thlak zingah hian AMSU secretary general pawh a tel nghe nghe a ni. Hemi a nih avang hian AMSU te hi an lungawi lo hle a, heng mite zawngchhuak tur hian state sorkar leh sorkar laipui chu an phut thu an sawi.

Jiribam AMSU district Committee president, Yurembam Sanjiv Singh chuan Cotland, Keithelmanbi, Khumbong, Lakhipur, Gulathor leh Babupara-a highway-te chu an dan thu a sawi a, sakhuana thil leh dam lohna vanga lirthei hmang te erawh an dang lo niin a sawi. An volunteer-te chuan lirthei engmah an tihchhiat dawn loh thu sawiin, tumah kut an thlak dawn loh thu a sawi bawk.

AMSU president Manjit Sarang­them chuan hel te hian an pawl GS hi kut an thlak bakah bus-a chuang te kut aṭang hian cheng 5000 an laksak niin a sawi.

Hemi chungchangah hian NSCN-IM lam chuan thuchhuah siam tawhin an tih a nih loh thu an lo sawi tawh nghe nghe a, Chief Minister N. Biren Singh pawhin pawi­khawihtute chu man turin thupek a tihchhuah tawh thu a lo sawi ve tawh bawk.

AMSU kawng dan hi Civil society organisation leh zirlai pawl ṭhenkhat pawhin an thlawp thu an sawi a, AAMSU pawhin an thlawp thu an sawi a ni.

Political party ṭhenkhat pawhin sorkar chu state chhung aṭanga NSCN-IM te umchhuak ngei turin an nawr ve bawk a ni.