Naga zirlai pawlin R-Day boycott turin ṭhalaite ngen

Naga Students Federation (NSF) chuan Naga ṭhalai leh zirlaite chu vawiina Republic Day lawmna neih tur chu an state-a Armed Forces (Special Powers) Act, 1958 hman mek duh lohna lantira boycott turin a ngen.

NSF president Kegwayhun Tep leh general secretary Supuni Ng Philo-te chuan India sorkarin Nagaland-a sipai thuneihna sang pekna policy a hman chhung chuan Naga mipuite chu hetiang lawmna thil lak aṭang hian an inlakhran a ngai a ni, an ti. "Eng chakna hmang mahin Naga mipuite aw hi hupbo theih a ni dawn lo," tiin an sawi.

Thawhṭanni khan NSF chuan an pawl hnuaiah unit leh thawhpui dangte hnenah Indian Armed and Paramilitary force-te thawhpui lo tura an member-te hriattir lo turin a hrilh nawn leh bawk. Sipaite lak aṭanga chhawmdawlna pawh dawng lo tura chahin, Naga mipuite dikna chanvo chu sipaite ruahmanna tenawm tak hmangin lei theih an ni lo, an ti.

NSF hian state sorkar hnenah nikum December thlaa security force-ten civil mi an kahhlum chungchang chhui tura a din, Special Investigation Team (SIT) report chu mipui hriata puangzar turin an ngen a, pawikhawihtute chu a rang thei ang bera hremna an phut thu an tarlang bawk.