Sikkim-ah political party thar ding dawn

Sikkim Democratic Front (SDF) aṭanga lungawi loa chhuakte chuan political party thar an din tur thu an sawi.

SDF hruaitu 42 te chuan party hi an chhuahsan a, an zingah hian south district vice president Ganesh Rai bakah deputy speaker hlui Sonam G.Lpech, minister hlui Dawcho Lepcha leh SDF thupuangtu Prashant Babu Chettri te pawh an tel.

Gangtok-a press confernce a neihah Ganesh Rai chuan SDF aṭanga chhuakte chuan kuminah political party an din tur thu leh, kum 2024 assembly inthlanah chuh an tum thu a sawi. "SDF party chhunga insiamṭhat ngai tam tak awm, Sikkim mipuite pawhin an beisei ang chu sorkar lai hnuaiah engmah tihhlawhtlin a ni lo a,hei vang hian rilru na tak chungin SDF party hi kan chhuahsan ta a ni," a ti.

Rai chuan SDF tan theihtawp a chhuah ṭhin tih sawiin, hetihlai hian beih an tawk fo a, party phatsanah hial pawh an puh ngei dawn niin a sawi. Mahse Sikkim mipuite tana rawngbawl chu an mamawhphurhna leh an duh ber a ni a, SDF-a awm chung chuan hei hi an tipuitling thei lo niin a sawi. Party thar an din tur chu SKM leh SDF aṭangin an rawn zawm belh zel a rin thu a sawi bawk. Ganesh Rai nupui, Tulsi Devi Rai hi kum 2019 thleng khan SDF sorkarah minister a lo ni tawh a ni. Mahse kum thum chhung SDF member a nihna a tinung tawh lo a, a hmalakna chu a thlawp tih Rai chuan a sawi.