Assam leh Nagaland-in court inrawlh loa ramri buaina chinfel inpeih

Nagaland chief minister Neiphiu Rio chuan Assam nena ramri chungchanga buaina an neih mek chu, court inrawlh kher ngai loa chinfel turin state pahnihte chu an inpeih tawh tih a sawi.

Assam leh Nagaland-a ramri buaina an neih mekna hmuna tuialhthei laihchhuah leh natural gas-te chu in sem an remti a ni.

Pathianni khan Rio hian Guwahati-a Assam chief minister Himanta Biswa Sarma a hmu a, state pahnih ramri chungchang hi an sawidun a ni. A hnuah Nagaland deputy chief minister Y Patton leh Naga People's Front legislature party leader TR Zeliang-ten Sarma hi an hmu ve leh bawk.

Rio chuan Assam leh Nagaland aiawhte chuan February thla tir lam hian Delhi-ah union home minister Amit Shah an hmu dawn tih a sawi.

State pahnihten ramri buaina an neihna hmunah hian kum 1971 aṭang khan CRPF-te dah an ni. Sorkar laipui chuan an buaina chinfel dan ngaihtuah turin KVK Sundaram Commission pawh a lo din tawh a, mahse Nagaland lam hian Sundaram Commission report-ah rawtna an siamte chu an pawm lo.