Padma Shri award dawng tur zingah hmarchhak mi 10 an awm

India-in civil mi chawimawina a pek zinga pakhat, Padmi Shri Award 2022 dawng tura thlan chhuah zingah hmarchhak state pariat aṭangin mi 10 thlan tel an ni a, an zingah hian hmeichhia pali an tel bawk. Heng mi 10-te hi field hrang hrang aṭangin chawimawina dawng tur hian thlan an ni.

Ministry of Home Affairs (MHA) chuan Thawhlehni khan chawimawina dawng turte hming hi a tichhuak a, hmarchhak bial aṭanga Padma Shri dawng tura thlante chu -

Assam aṭangin mi pahnih niin, Social Work field-ah Shakuntala Choudhary leh Literature & Education field-ah Dhaneswar Engti-te an ni.

Manipur aṭangin mi pathum thlan chhuah an ni bawk a, Art field-ah Lourembam Bino Devi leh Kensam Ibomchan Singh-te niin, Trade & Industry discipline-ah Muktamani Devi thlan a ni bawk.

Nagaland aṭangin editor hlui, T Senka Ao chu Literature & Education field-ah Padma Shri dawng tur hian thlan a ni.

Sikkim aṭangin Khandu Wangchuk Bhutia leh Mizoram aṭangin VL Nghaka te chu Art leh Literatur & Education field-ah chawimawina hi hlan an ni dawn.

Arunachal Pradesh mi, Guru Tulku Rinpoche chu Spirituality discipline-ah chawimawina dawng tur hian thlan a ni a, Meghalaya-a North Eastern Hill University (NEHU)-a Department of Khasi Language Professor, Badaplin War chu Literature & Education field-ah Padma Shri award dawng turin thlan a ni bawk.

Kumina Padma Award dawng tura thlante hi mi 128 an ni a, (an zingah hian indawn ṭawm tur an awm) Padma Vibbhusan 4, Padma Bhushan 17 leh Padma Shri Award dawng tur mi 107 thlan an ni. Chawimawina hi March/April velah Rashtrapati Bhawan-ah India President-in a hlan ṭhin.