Assam sorkarin police fake encounter chungchanga Affidavit thehluh nan HC hnenah hun pek belh dil

Assam sorkar chuan nikum May thla aṭanga Assam Police-ten inbeihna lem, fake encounter an thlen fo nia puh chungchangah, Gauhati High Court-in affidavit thehlut tura a tih chu hun pek belh a dil.

Thawhlehni khan sorkar aiawh, advocate general Devajit Saiki chuan affidavit thehluh nan hian ni 10 hun pek belh turin High Court hi a ngen.

Gauhati High Court hian January 11 khan Assam sorkar hnenah affidavit kimchang tak kar hnih chhunga thehlut turin a hriattir a ni. Mahse sorkar lamin hun pek belh a dil tak avangin he case hi February 8-a ngaihtuah turin dah a ni ta a ni.

New Delhi-a advocate leh activist Arif Jwadder chuan Gauhati High Court-ah affidavit thehlutin, fake encounter case hrang hrangte chhui chian a nih theihna atan FIR thehlut tura thupek tichhuak turin a ngen. Hei bakah hian Central Bureau of Investigation (CBI), Special Investigation Team (SIT) emaw, state danga police-te team chu High Court enpuina hnuaiah Assam police-ten dik lo taka mi an beihna thleng nia sawi hi chhuichian tir turin a phut bawk.

Jwadder hian PIL a thehluhah, kum 2021 May thla aṭang khan Assam-ah police fake encounter hi ṭum 80 a thleng tih sawiin, mi 28 in an thih phah bakah midang 48 in hliam an tuar phah bawk a ni, a ti. Fake encounter nia sawi leh heng inbeihna thlenga police-te kut tuara thi nia sawi chungchang chu Gauhati High Court judge ṭanglai chhui chian tir a, mitthi chhungte hnena zangnadawmna pek dan turte ngaihtuahsak turin a ti bawk.