Assam leh AP-in ramri buaina endik dawn

Assam leh Arunchal Pradesh sorkar chuan state ramri buaina an neih mek chingfel tura hma lak ṭan an rel a, ramri buaina an neih mekte chu a hmuna tlawha endik an tum.

Thawhṭanni zan khan Assam chief minister Himanta Biswa Sarma leh Arunachal Pradesh chief minister Pema Khandu-te chuan Guwahati-ah state pahnih ramri buaina neih chungchang hi an sawidun a ni. Meeting an zawh hnuah hian Sarma chuan hun rei tak state pahnihten ramri chungchanga buaina an neih tawh chinfelna tura hmalak tum a nih thu te, ground level survey an neih turte a twitter-ah a sawi nghal a ni.

North East Democratic Alliance (NEDA) convernor ni bawk, Assam CM Sarma chuan an ṭhenawm state-te nena ramri chungchanga buaina an neihte chinfel chu an ngaih pawimawh thu a sawi.

Assam leh Arunachal Pradesh ramri hi km 804.1-a thui niin, point 1,200 velah buaina an nei a ni.

Sarma chuan Arunachal Pradesh nen inbiakna mumal takin an kalpui ṭan tih a sawi a, ramri hrula chngte pawh kawm leh biakrawn vek an nih dawn avangin resolution siam tur chuan hun pawh a la duh rei deuh dawn tih a sawi. Meghalaya nena ramri buaina chingfel tura hma an laknaa state sorkarin regional committee a lo din tawh ang kha Arunachal Pradesh nena an inkara hma la turin din a ni ve leh dawn tih a sawi bawk.

Assam CM hian Pathianni khan Nagaland chief minister Neiphiu nena inhmuin, Assam leh Nagaland ramri buaina neih mekte an sawidun a, an buainate chu court inrawlh kher ngai loa chinfel dan ngaihtuah an remti a ni.