Assam-ah hri kai hmuh chhuah tam ber ni a thleng Hri kai hmuh thar mi 1,202 an awm

Assam state-ah kar liam ta Inrinni khan Covid-19 kai hmuh chhuah thar mi 1,202 an awm a, ni khata hri kai hmuh chhuah tam ber ni a ni. Hri kai hmuh chhuah thar zinga 777 hi Guwahati khawpui chhunga mi an ni. 

Assam-a hri kai hmuh tawh hi mi 11,001 an ni tawh a, an zinga 6,327 chu enkawl dam ni tawhin, enkawl mek mi 4,657 an awm. 

Guwahati khawpui bikah hri kai an pun chak avangin July 14 thleng complete lockdown puan a ni a, mahse khawpui chhunga Kamrup (Metro) district bikah chuan nimin leh vawiinah thlahdulin, eichawp dawrte an inhawn phalsak an ni. Health minister Himanta Biswa Sarma chuan Inrinni khen PPE kit nena inthuamin, Guwahati Medical College Hospital-a Covid-19 kai na zual, ICU ward-a enkawl mekte a tlawh kual. Minister chuan doctor-te chuan damlo te chu an enkawl ṭha hle tih sawiin, lawmthu a sawi nghal a ni. 

Minister hian Khanapar field, Guwahati-a Covid Care Hospital siam thar pawh a tlawh a, he hmuna hri kai enkawl mekte enkawl an nih dante enfiahin, damlote a tlawh kual bawk. Guwahati-a Governor Office-a thawk pahnih chu Covid-19 an kai tih hmuh chhuah a nih avangin, Raj Bhawan campus leh a chhehvel chu containment zone-ah puan a ni bawk. Assam-ah hian sample 4,49,629 test a ni tawh a, hmun dang aṭanga haw sorkarin quarantine centre a siama awm mek hi 13,040 awmin, home quarantine 1,28,247 an awm mek bawk a ni.