Nagaland-ah ui sa zawrh khap

Nagaland sorkar chuan ui sa, a hring leh a siamsa zawrh a khap a, state dang aṭangin talh tura ui lakluh a khap bawk.

State sorkar chuan politician, Maneka Gandhi hnen aṭanga nawrna a hmuh hnuin he thutlukna hi a siam a ni. Maneka Gandhi hian Nagaland-a animal protection group hnen aṭangin Dimapur wet market-a bawma phuarhlawm chunga ui dahkhawm lai thlak a dawn hnuah, Nagaland sorkar hnena hian ngenna a siam zui a ni. Federation of Indian Animal Protecton Organisation (FIAPO) pawhin ui sa zawrh khap turin stater hnenah ngenna a thlen zui bawk. Hemi hnua cabinet meeting chuan ui sa zawrh hi a khap ta tih chief secretary Temjen Toy chuan Zirtawpni khan a sawi. 

Animal rights advocacy group, Humane Society chuan Nagaland-ah hian talh turin ui hi kum khatah 30,000 vel tawlh luh a ni ṭhin tih a sawi a, hengte hi bazar-ah zawrh chhuah an  ni ṭhin a ni. State cabinet thutlukna hi animal activist hrang hrangteb lawmawm an tih thu an sawi rualin, cabinet-in hemi chungchang a ngaihtuah laia  Naga hnam, an food culture-a uisa telte a rawn lo chuan sawizui a hlawh thung. Naga hnamten an customary law leh social practice an chhunzawm phalsakna tura special right pek an nihna, Article 371A ngaih pawimawh lohna niin an sawi ve thung.