Assam NRC Coordinator lakah BJP lungawi lo

Assam-a rorellai Bharatiya Janata Party (BJP) chuan Assam National Register of Citizens (NRC) coordinator Prateek Hajela lakah an lungawi loh thu an sawi.

Prateek hian Supreme Court hnenah NRC draft list-a tel lo ten telh leh an dilna tur atana document ngai 15 zinga panga telh lo tura rawtna a thehluh avangin BJP hi an lungawi lo a ni.

State BJP president Ranjeet Dass chuan hetianga ti tur hian tu in nge thuneihna pe tiin zawhna a zawt let a, a thil tih dan hi Assam Accord kalh a nih thu a sawi. Dass chuan NRC case buaipuitu midang tumah a rawn lo tih a sawi bawk.

Ranjeet Dass chuan state sorkar pawh a rawn lo a, Chief Minister Sarbananda Sonowal pawhin Hajela hian a rawn lo tih a sawi bawk niin a tarlang.

Supreme Court chuan September 5 hian NRC chungchangah hearing a ko a, Hajela hian document panga hi list ennawn nan atana telh lo tur hian rawtna a thlen.

Heng document panga paih tura a rawt te te hi 1951 NRC, 1971 electoral roll, citi­zenship certificate, refugee certificate leh ration card-te an ni. Dass chuan NRC apply hunlaia heng document te hi pawm a nih si chuan engtin nge phal loh a nih leh thut theih? Huntawp dawn minute 15 vel la awma game rules thlak leh ang a ni, tiin nasa takin a sawisel.

Dass chuan hemi chungchang hi sorkar laipui lama an party hruaitute hnenah pawh an thlen tawh tih a sawi a, Union Home Minister Rajnath Singh leh national president Amit Shah pawh an hriattir tawh thu sawiin state leh sorkar laipui chuan Supreme Court-ah Hajela rawtna dodal tur hian affidavit thehlut se an duh thu leh an ngiat thu a sawi.

State BJP President chuan NRC list aṭang hian India khua leh tui dik tak te chu hmaih an nih lohna turin an theihtawpin an bei dawn tih a sawi bawk.

Hetihlai hian BJP general secretary Ram Madhav chuan Thawhṭanni khan Assam NRC final list tihchhuah a nih huna tel lo te chu ramchhung aṭanga chhuahtir an nih dawn thu a sawi.

‘NRC: Defending the Borders, Securing the Culture’ seminar neihnaah Ram Mandhav chuan NRC chu 1985-a 'Assam Accord' ziah peng pakhat atana update a nih thu a sawi a, ramdang mi dan loa ram chhunga awm hriat­chhuah­na tur atana tih a nih thu a sawi bawk.

Seminar-ah hian Assam CM Sarbanada Sonowal chuan India khua leh tui dik tak chuan NRC list-a telna chance hi an nei vek dawn tih sawiin, India rampumah NRC kalpui hi a duh thu a sawi ve thung a ni.