Child marriage leh teenage pregnancy rate sang zingah Hmarchhak state pathum lang

National Commission for Pro­tection of Child Rights (NCPCR) report in a tarlan danin India Child Marriage and Teenage Pregnancy report-ah chuan hmarchhak state pathum Tripura, Assam, leh Arunachal Pradesh-te chu state rate sang zual 12 zingah an tel a, heng state-te rate hi national average ai pawhin a sang zawk.

Report hi Nilaini-a tlangzarh kha niin ramchhunga kum tling lo/naupang pasal nei(child marriage) thlen nasatna district 100 thlanchhuah zinga district 13 chu Assam leh Tripura chhunga mi a ni.

Report hi National Family Health Survey (NFHS4) zulzuia siam a ni a, NFHS3 2005-06 report aṭanga thlir chuan child marriage rate hi a tlahniam tawh hle thung. Khawpui lam aiin thingtlang lamah a hluar zawk nia tarlan a ni bawk.

NCPCR report aṭanga state rate sang zual 12-te chu - West Bengal (25.6 %), Rajasthan (16.2%), Gujarat (13.1%), Jharkhand (17.8%), Bihar (19.7%), Mahara­shtra (12.1%), Andhra Pradesh (16.6%), Assam (16.7%), Tripura (16.7%), Arunachal (12.1%), Telangana (12.9%) leh Dadar and Nagar Haveli (17.5%) te an ni.

Adolescent and Child Rights Network coordinator, Chiranjeeb Kakoty chuan an state-a child marriage leh tleiawl laia rai(teenage pregnancy) rate san chhan chu zirna ṭha dawn loh vang te, skill development neih loh vang te, dan kenkawh ṭhat a nih loh vang te leh sakhaw hotute chet lak dan vang te niin a sawi.

ST hmeichhe zinga child marriage tamna ber Arunachal :

National Commission for Protection of Child Rights (NCPCR) report aṭanga a lan dan chuan Arunachal Pradesh chu Sche­duled Tribe hmeichhe zinga kum tling lo/naupang pasal nei (Child marriage) tamna ber a ni.

NCPCR report chuan ram­chhunga child marriage tam chu Scheduled Tribe (15 %) leh Scheduled Castes (13 %) zingah a ni tih an tarlang.

Nilaini-a report tihchhuah hi National Family Health Survey (NHFS) in kum 15-19 inkara child marriage chungchang a zirchianna vawi thumna leh vawi lina an neih behchhana siam a ni a, NCPCR ṭan­puina in research centre, Young Lives India chuan report hi an buatsaih thung.

SC bikah chuan West Bengal chu child marriage tamna ber an ni a, ST-ah chuan Arunachal Pradesh-ah a tam ber a ni.

OBC hmeichhe zinga child ma­rriage tamna state-te chu Bihar, Guja­rat leh Telangana-te an ni bawk.