Manipur in lirthei kum 15 aia upa khalhchhuah khap dawn

Manipur Pollution Control Board chairman L. Radhakishore chuan Nilaini khan auto-rickshaw leh lirthei dang kum 15 aia upa te chu khalhchhuah an khap mai thei niin a sawi.

Radhakishore chuan cabinet meeting neih leh hunah boruak bawlhhlawh chungchang an sawi dawn tih a sawi. Mihring hriselna in a tawrh zel lohna turin heng lirthei upa tawh lam hi chu khap a ṭul hle tawh niin a sawi a ni.

Pollution Control Board chairman chuan auto-rickshaw 70% vel chu an hlui tawh hle tih sawiin khalhchhuah tlak an ni tawh lo tih a sawi a, tihbo an ngai tawh niin a sawi bawk.

Imphal chhunga ri bengchheng tam lutuk pawh thunun a ngai niin a sawi bawk a ni.

Mi ṭhenkhat chuan Manipur chu lirthei hlui dahkhawmna hmun a nih thu an sawi a, state danga khalh tlak tawh lo nia an ngaih te chu Manipur-ah hian an chawlut ṭhin niin an sawi. Tunhnaiah lirthei hi a pung nasa hle nia sawi a ni bawk a, tlawm te te pawhin lei tur a awm nia sawi a ni bawk.