Tripura Gram Panchayat inthlan turah BJP in seat 96% la sa

Tripura State Election Commission official chuan state-a rorellai Bharatiya Janata Party (BJP) chuan Panchayat inthlan awm turah chuhpuitu awm loin Gram Panchayat, Panchayat Samiti leh Zilla Parishad seat 18 awmah te chuan seat 96% an la nghal tih an sawi.

Tripura Panchayat inthlan ṭhat hi Sep­tember ni 30-a neih tur a ni a, Gram Pan­chayat seat 3,207, Panchayat Samiti seat 161 leh Zilla Parishads seat 18-a ruak a ni.

BJP kaihhruaina hnuaia sorkar siam a nih khan Left Party tam tak chuan an Panchayat seat hi an chhuahsan a, mi eng emaw zat thi an awm tawh bawk avangin hetiang zat seat hi a ruak tih an tarlang.

SEC offical te chuan BJP hian chuhpuitu nei lo in Gram Panchayat seat 3,075, Pan­chayat Samities seat 154 leh Zilla Parishad seat 18 an la sa tih an sawi a, September 30 hian Gram Panchayat seat 132-ah leh Panchayat Samiti seat pasarih-ah chiah inthlanna hi neih a ngai dawn tih an sawi.

Kar kalta Zirtawpni kha nomination withdraw leh theih hun hnuhnung ber a ni tawh a, candidate hi tihdanglam theih a ni tawh lo a ni.

BJP lo zawngin inthlan hun sawn duh:

Hetihlai hian BJP tih loh party dang zawng zawng deuh thaw chuan Panchayat inthlan hun hi sawn an duh a, sawn duh zingah hian BJP thawhpui Indigenous People’s Front of Tripura (IPFT) pawh an tel.

Communist Party of India-Marxist (CPI-M), Congress, IPFT leh Tribal party dangte pawhin inthlan hun hi sawn an duh thu SEC hnenah hian an hriattir tawh a, tharum thawhna a tam avanga nomination thehlut lo an nih thu an sawi.

Party dang zawng hian kar liamta Thawh­ṭanni leh Thawhlehni-a Block 35-a nomi­nation an file tur chu BJP thlawptu ten an dang tih an sawi a, mahse hei hi BJP chuan an pha thung.

Police-te chuan kar liamta Thawhṭanni leh Thawhlehni khan BJP, IPFT leh Congress thlawptu 25 vel leh police 10 vel chu an innekbuainaah an hliam tih an sawi a, hmun 12 velah buaina hi a chhuak niin an sawi.

Hetihlai hian BJP thupuangtu Mrinal Kanti Deb chuan eptu party, a bik takin CPI-M-te chuan candidate tur an neih ṭhat tawk loh vangin Panchayat inthlanah hian seat an chuh ngam lo niin a sawi thung a, party dang te pawh inthlan ṭhat turah hian an tui tawk lo niin a sawi thung.

Mahse CPI-M central committee member Gautam Das chuan Tripura State Election Co­m­missioner G Kameswara Rao chuan Tripura boruak chu dik leh fair taka Panchayat inthlan hmachhawn turin a la inpeih lo tih a sawi. Block 35 awm zinga block 28-ah chuan BJP ni lo tan nomination file phal a ni lo tih sawiin BJP thlawptu ten an lo dang zel niin a sawi.