Assam tuilianin khaw 76-ah mi 25000 nghawng

Assam leh Arunachal Pradesh-a ruah sur nasa avanga kar liamta Ni­ngani-a Ranganadi dam-a gate pathum hawn vanga tuilian chuan Assam thing­tlang khaw 76 a cheng mi 25,000 a nghawng.

Ranganadi dam hi Arunachal Pradesh-a Lower Subansiri district-a awm niin Neepco thunei­tute chuan Ningani khan tuikhuah hi a khah lutuk avangin tuikhuah gate pathum an hawng a ni.

Hei hian Lakhimpur dis­trict-a thingtlang khaw 76 chu a tibuai hneh hle a, mi 25,000 vel chuan buaina an tawh bakah thlai chinna hmun hectre 3,560 a tichhe bawk.

Tuikhuah sah tur thu hi Lakhimpur dist mipuite hi hriat­tir hmasak an ni a, thi leh hliam erawh report a awm hrih lo thung.

Nikum March 11 khan he tuikhuah sah a nih avang tho hian thingtlang khaw 220 chuan harsatna nasa tak an lo tawk tawh bawk a ni.

Assam leh Arunachal Pradesh hian ruah sur nasat avangin tunhnaiah harsatna an tawk nasa hle a, mi nuai khat velin ruahsur vang hian harsatna an tawk mek nia sawi a ni a, mi 805 vel chu relief camp pathumah an awm mai bakah lawng service pawh eng emaw zat pawh chawlhtir hrih an nih thu report chuan a tarlang.

Northeast Frontier Railway pawhin rel service pariat vel an dintir hrih tih an sawi ve bawk.