AP tuilianah mi panga thi tawh

Kar kalta Ningani-a Ranganadi dam-a gate pathum hawn vanga tuilian chuan Arunachal Pradesh leh Assam-ah hmun tam tak a chim a, Pathianni tlai khan official te chuan Arunachal Pradesh-ah mi panga in nunna an chan phah tawh tih an sawi.

Hetih lai hian hmeichhe pakhat chin hriat lohin a awm mek bawk.

Banderdewa Police leh NDRF team-te chuan Assam Lakhimpur district bula Pithaguri thingtlang khaw bula Dikrongn luiah Modirijo nu pakhat ruang chu Inrinni zan khan an hmu niin Capital Deputy Commissioner Prince Dhawan chuan Pathianni tlaiah khan a sawi a, hetihlai hian hmeichhe naupang kum 10 mi chu chin hriat loha a awm mek thu a sawi a ni.

DC chuan tuilian hian in 26 a len tih sawiin, in 60 vel chu nasa taka a chhiat thu a sawi a, Modirijo, Donyi Polo area, Chandra Nagar, Lobi, GSS Police colony leh Press colony-te chu tuilianin a nghawng nasatna lai hmun te an nih thu a sawi.

Tuilian hian Modirijo panna kawng chu a chim vek a, kalpawh a harsa hle a ni.

Itanagar MLA Techi Kaso leh DC-te chuan chhawmdawlna bungrua blanket, bungbel leh ei tur te an sem a, anni bakah hian medical team-te pawhin chhawmdawl hna an thawk bawk a ni. DC chuan mobile ambulance pawh hman a nih thu a sawi bawk.