Cabinet pawmpuina loin Assam minister-ten scheme thar an puan khap

Assam cabinet chuan minister zawng zawng, chief minister pawh huam telin, cabinet-in a pawmpui loh chuan scheme thar siamte mipui hriatah an puanzar a khap.

Chief minister Himanta Biswa Sarma hoa cabinet meeting-ah hei hi an rel a ni.

CM Sarma chuan minister-ten official tour leh public programme an neihah, sorkarin a lo puanzar tawh emaw, budget-a telh tawh scheme chungchangah chuan information an pe ṭhin tur a ni, a ti. "Scheme thar siam turte chu a thawhna tur sum a awm leh awm loh chungchangte cabinet-in a ngaihtuah hma chuan engmah puanzar rih lo tur a ni. Mahse department hrang hrangte biakrawn a, cabinet-in a pawmpui hnuah erawh scheme thar chungchang chu function-ahte an puang thei ang," a ti.

Cabinet meeting hian March 14 aṭangin Assam legislative assembly budget session neih a rel bawk.

Meeting zawhah press conference a neiha, health and family welfare minister Keshab Mahanta chuan Chief Minister kalvelna avangin traffic tihbuai a ni tur a ni lo, a ti. "A ṭul nih chuan traffic chu minute hnih aia rei lo chauh tihdin tur a ni. Chutiang hunah pawh CM convoy chu ambulance-te chuan an tlanpel thei reng a, lo tihdin tur an ni lo," tiin a sawi.

Mipuite tana harsatna thlen lo turin, CM zuitu chu Guwahati khawpui chhunga car paruk aia tam lo leh, state chhung hmun dangah motor 12 chin a ni dawn a, hei hian escort leh pilot motor erawh a huam tel lo ang tiin Mahanta chuan a sawi bawk a ni.

Sorkar function neihnaah minister leh senior official-te chawimawi leh thilpek pek ṭhin chu titawp turin cabinet chuan a rel bawk. Hmun dang aṭanga palai sawmte erawh lawmthu sawina pek theih a ni thung ang.