Assam-Arunachal border-ah intibuai

Assam leh Arunachal Pradesh ten ramri buaina an neih mekna hmunah Arunachal Pradesh sorkar hnuaia contractor pakhatin kawng a siam Dhemaji district-a Gogamukh-a chengte chuan duh loin an lo dodal a, buaina a chhuak zui a ni.

Assam chief minister Himanta Biswa Sarma chuan Ningani khan Guwahati-ah press conference neiin, Dhemaji leh Lakhimpur deputy commissioner-te chu Arunachal Pradesh lama an thawhpuite bia a, an buainate chinfel dan ngaihtuah nghal tura hrilh an nih thu a sawi.

Ramria buaina hi Nilaini zana Assam ram chin,Gogamukh police station hnuaia Hime Basti area-a thleng a ni. Official chuan,"Assam lama tualchhung mite chuan Arunachal Pradesh sorkarin kawng a siam hi an duh lo ni. Kawng siamna hmuna khawchhung mite an va kal chuan contractor pakhat chuan van lam hawiin silai a lo hmetpuak a ni," a ti.

Arunchal Pradesh sorkar hian Likabali leh Durpai inkar kawngpui, km 70-a thui chu PMGSY hnuaia a siam mek a, tualchhung mi contractor-te a chhawr a ni.

Assam aṭanga kalte kawng siam hna thawh lai chu an tihtawp luih tir a, motor ṭhenkhat tichhiain kawng siamte awmna camp pawh an halsak zui bawk. He thil thleng an hriat hnu hian Assam Police-te pawh a hmunah hian an kal ve nghal a, buaina pawh a chhuak zui tawh lo niin police official chuan a sawi.

Arunachal-a Lower Siang district SP Kushal Pal Singh chuan Nilaini zana buaina chhuak hi chu tualchhung mite inkar nia sawiin, venhimna erawh tihkhauh a ni a, boruak pawh a pangngai chho leh nghal tih a sawi bawk. He thil thlengah hian pawl emaw, sorkar lam emaw inrawlh an awm lo a, tualchhungte mite inkar a ni,a ti.