PLA-in Indian Army kutah Arunachal tleirawl hlan

China sipai, People's Liberation Army (PLA) chuan Ningani khan Arunachal Pradesh tleirawl, Miram Taron chu Damai Border Personnel Meeting point-ah Indian Army kutah an hlan.

Kum 17 mi, Miram Taron hi January 18 khan ramri, line of actual control (LAC) bul aṭangin chin hriat loin a bo a, Indian Army chuan PLA te hi hotline kaltlangin an be nghal a ni. January 26 khan PLA chuan Miram hi India Army kuta hlan a ni dawn tih an rawn sawichiang ve leh bawk.

Defence thupuangtu chuan Taron pawh a dinhmun a ṭhain an khaw lama a kir leh thei tur chu a hlim hle tih a sawi. Him taka a kir leh theihna tura Indian Army leh sorkar hmalakna avangin a chhungte pawhin an lawm thu an sawi bawk.

Indian Army chuan Border Defence Coopration agreement an lo siam tawh PLA-in tihhlawhtling a, Arunachal tleirawl India hnena a hlan chu lawmawm an tih thu a sawi. Union law minister Kiren Rijiju pawhin Taron hi him takin India sipaite kuta hlan a ni a, medical exam pawh neih sakin a dinhmun pawh a ṭha tih a sawi.