Assam human rights panel-in Assam chief secretary show cause notice pe

Assam Human Rights Commission (AHRC) chuan tun hnaia Assam police-ten Nagaon district-a zirlai pawl hruaitu hlui, Kriti Kamal Bora an kah chu mihring dikna chanvo bawhchhiatna a ni tiin, Assam chief secretary hnenah show cause notice a pe.

AHRC chuan Potection of Human Rights Act, 1993 Section 18 hmanga zirlai hruaitu hlui hnena zangnadawmna pek a nih theih lohna chhan a zawtfiah a ni.

Kum 22 mi, Bora hi January 22 khan Nagaon police-ten ruihhlo zuar an dapna lamah a keah an kap fuh a, hei hian state chhungah lungawi lohna pawh a thlen nasa hle. Assam chief minister Himanta Biswa Sarma pawhin state additional chief secretary chu he thil thleng chhui chiang turin a ruat nghal bawk.

Police-te chuan Bora hi ruihhlo zawrhnaa inhnamhnawihin police-te a lo bei a, invenna atan an kap niin an sawi. Mahse a chhungte chuan dawt hmangin an puh tih an sawi ve thung.

Bora hi kahhliam a nih hnuaha damdawi-inah enkawl a ni a, mahse sorkar lam atangin zángnadawmna pekna tur engmah sawirik a awm lo. Hei vang hian AHRC chuan show cause notice hi pein, "Chief secretary hnenah hian Protection of Human Rights Act, 1993 Section 18 Clause (c) a tarlan anga zángnadawmna pekna tur rawtna siam a nih loh chhan zawhfiah a ni," tiin AHRC official chuan a sawi a, February 28 thleng chhanna pe turin hun an pe nghal bawk.

Assam.police te hi dawt hmanga inbeihna, fake encounter thlena puhna a tam chho hle. AHRC official chuan hetiang thil thleng nia sawi ṭhinah show-cause notice hi an la pe lo tih a sawi a, mahse a thlen ngun tak em avangin tih ngei a ngai ta a ni, a ti. "Nikum May thla atang khan police-ten dawt hmanga inbeihna an thlen nia sawiah mi 30 vel an thi tawh a, mi 50 velin hliam an tuar bawk a ni," a ti.