Sikkim: JAC in 2019 inthlanah Golay tel theih thu sawi

Joint Action Committee (JAC) chuan thubuai nei lai tana election laws leh constitutional provision-te sawichhuakin JAC vice convenor Nawin Kiran Pradhan chuan 2019 state inthlanah Sikkim Krantikari Morcha (SKM) President Golay a din theih dawn thu a sawi.

JAC vice convenor Nawin Kiran Pradhan chuan Golay din theih leh theih loh tur chung­chang chu Sikkim-a sorkar mek SDF leh eptu party SKM inkara inhnialna lian ber a nih thu sawi.

Pradhan chuan Representation of People’s Act 1951 hnuaia 8(1)(m) hmang chuan Golay hi a ding thei lo ngei a, mahse RP Act, 1951 Section 11 hnuaiah erawh section 8 subsection 1(m) hnuaia thubuai siamsak te thubuai paihsak dan a awm a ni, a ti. Hemi anih avang hian SKM President Golay pawh hian RP Act, Section 11 behchhan hian Election Commission hnenah petition a thehluh vat chuan inthlanah hian a ding thei dawn niin a sawi bawk.

JAC VC chuan Golay chu Sikkim Legislative Assembly aṭangin vawihnih disqualified a nih tawh thu a sawi a, SDF chhuahsana SKM a zawm leh court thubuai nikuma a neih ṭum khan Legislative Assembly member a nihna aṭanga ban a nih thu a sawi.

Prevention of Corruption Act hnuaia eirukna thubuaiah kum khat zet tan tir a nih hnuah thla hmasa khan chhuahtir a ni a, thubuai nei lai a la nih avangin sorkar lao SDF chuan 2019 leh 2024 inthlanah a ding theu dawn lo tih an sawi laiin SKM chuan 2019 Assembly inthlanah an party Chief Ministerial candidate a nih dawn thu an sawi thung a ni.