Tripura: 2019 Lok Sabha inthlanah BJP-IPFT ṭangrual leh maithei

Bharatiya Janata Party (BJP) National General Sec­retary Ram Ma­dhav chuan Pathian­ni khan Tripura tlawhin BJP leh IPFT inkara buaina awm te chinfel dan tur sawipuina a nei a, hemi hnu lawk hian 2019 Lok Sabha inthlanah BJP-IPFT-te chu an thawkho leh maithei niin report ṭhenkhatah chuan an tarlang.

Ram Madhav hian BJP leh IPFT hruaitu ten inbiakna an neih chu a telpui a, Panchayat inthlan tur chungchanga party pahnih inkara inhriattiam lohna awm te chu chinfel dan an sawi ho a ni. Meeting hi State guest house-ah neih niin Chief Minister, Deputy Chief Minister leh party pahnih hruaitu pawimawh te chu an tel kim hle.

Mandhav chuan Tripura chu a vawikhat tlawhna a nih thu sawiin BJP leh IPFT thawhhona pawh a kaltluang hle tih a sawi.

BJP State General Secretary Rajiv Bha­ttacharya chuan mee­ting an neih zawh hnu hian party pahnih te chuan LS inthlana thawhho dan tur chungchang an sawi dawn tih sawiin an thawh ho ngei theih nan hma an lak dawn thu a sawi bawk.

Tribal Welfare Mi­nister Mevar Kumar Jamatia pawhin Pathianni zanag khan BJP National Secretary chu meeting an neihpui thu sawiin Mandhav chuan party pahnih te ṭha taka an thawhho zel theih nan hma a lakpui dawn thu a hrilh tih a sawi a ni.

BJP leh IPFT-te hi tun thla tawpa Tripura Panchayat inthlan ṭhatna neih tur chungchangah nasa takin an intibuai a, a hruaitu chinah buaina chhuak lo mah se sub-division level velah hmun hrang hrangah buaina a chhuak a, hliam tuar pawh an awm phah nual a ni.

Panchayat inthlan sawn hlat duhtu zingah hian IPFT pawh hi an tel nghe nghe a, BJP tih loh state chhunga party dang zawng zawng deuh thaw chuan Panchayat inthlan hi sawn hlat an duh thu an sawi.